अनुसूचित जाती-जमाती अत्याचार प्रतिबंधक सुधारणा विधेयक संसदेत संमत

लोकसभेने 6 ऑगस्ट 2018 रोजी संमत केलेले अनुसूचित जाती-जमाती अत्याचार प्रतिबंधक सुधारणा विधेयक- 2018 काल राज्यसभेत संमत करण्यात आले.

केंद्रीय सामाजिक न्याय आणि सबलीकरण मंत्री थावरचंद गेहलोत यांनी हे सुधारणा विधेयक राज्य सभेत मांडले.

कायद्यामधील नवीन तरतुदी –

कायद्याच्या कलम 18 च्या तरतुदी पुनर्स्थापित करण्यासाठी 18- अ हे कलम घालण्यात आले आहे.

त्यानुसार अनुसूचित जाती जमाती अत्याचार प्रतिबंधक कायद्याच्या अंतर्गत एखाद्या व्यक्तीच्या विरुद्ध प्रथम माहिती अहवाल नोंदवण्यासाठी प्राथमिक चौकशीची गरज नाही.

ज्या व्यक्ती विरोधात या संदर्भातला  गुन्हा नोंदवण्यात आला आहे, अशा व्यक्तीला अटक करण्यासाठी तपास अधिकाऱ्याला, परवानगी घ्यायची आवश्यकता नसेल.

हा कायदा किंवा फौजदारी  दंड संहिता 1973 शिवाय कोणतीही प्रक्रिया यासाठी लागू राहणार नाही.

तीन महापाषाणयुगीन स्थळांचा शोध

इतिहास अभ्यासक अमित भगत यांना चंद्रपूर, भंडारा जिल्ह्य़ात बृहदाश्मयुगीन महापाषाणयुग काळातील तीन नवीन स्थळे आढळून आली आहेत. यात चंद्रपूर जिल्हय़ातील कसर्लामांगली तर भंडारा जिल्हय़ातील चन्नेवाडा या स्थळांचा समावेश आहे. याचा कालखंड साधारण इसवी सन पूर्व १५०० ते इसवी सन पूर्व २०० यादरम्यानचा असावा, असा अंदाज अमित भगत यांनी व्यक्त केला.

अमित भगत यांचे संशोधन -

भगत यांनी आतापर्यंत पाच बृहदाश्मयुगीन संस्कृतीची स्थळे शोधली आहेत. यामध्ये डोंगरगाव, नवखळा, कोरंबी, बनवाही व भंडारा येथील चांदी या स्थळांचा समावेश आहे.

भाारतीय पुरातत्त्व सर्वेक्षण विभागाने सुद्धा त्यांच्या या संशोधनाची विशेष दखल घेतलेली असून तत्संबंधीचा उत्खननाचा प्रस्ताव विचाराधीन आहे.

अमित भगत यांना आठ स्थळांवर मानवी वसाहतीचा सबळ पुरावा म्हणून सूक्ष्मपाषाणाची हत्यारे, काळय़ा, तांबडय़ा, करडय़ा रंगांची अभ्रकयुक्त खापरे व प्राचीन लोहभट्टीचे अवशेष आढळून आले आहे.

कसर्ला –

कसर्ला येथील ‘झिकाटीची हुडकी’ म्हणून ओळखल्या जाणाऱ्या जागेवर चार विशाल शिलास्तंभ आढळून आले असून त्यातील सर्वात मोठय़ा शिलास्तंभाची उंची २.१ मीटर, रूंदी १.६ मीटर व जाडी १७ से.मी. आहे.

मांगली –

मांगली गावानजीकच्या जंगलात चंद्रपूर व भंडारा जिल्हय़ाच्या सीमेजवळ ७ स्लॅबवर्तुळे, दोन शीलावर्तुळे, पाच शिलापेटिका व एक शिलास्तंभ आढळून आले आहेत.

चन्नेवाडा –

भंडारा जिल्हय़ात समावेश होणाऱ्या चन्नेवाडा गावानजीकच्या जंगलात तीन स्लॅबवर्तुळे, तीन शिलापेटिका व अनेक लहान स्लॅबरूपी शिलास्तंभ आढळून आले आहेत. ही स्थळे  हत्यारनिर्मिती कारखान्याची असण्याची दाट शक्यता आहे.

error: